We liferet denn do?

I bi d’Rosie. I ha Multimedia Production a de Fachhochschuel Graubönde gstudiet ond i dem Rahme isch au da Projekt «Lifere ond Lafere» entstande. Viellicht hesch mi abe au scho im Radio ghööt ode uf de Bühni gseh, seb machi ebe au no.

I bi z’Appezöll ufgwachse, bi denn abe vo föfzeh Joh uf St. Galle zöglet. Do gfallts me choge guet, au will s’Appezölleland so schö nööch isch. Abe noch söfel Joh i de Stadt hani gmeckt, dass min Appezölle Dialekt je lenge s’je meh vewäschne wääd.
Ond do bini nüd die enzig! Vo Generation zo Generation schwecht sich ösen Innerhode Dialekt all e chli meh ab. E isch bi de junge Lüüt nomme so bräät wie no bi ösne Grossöltere ond au en huffe Wöötli gönd all meh veloore. Do hani welle nebis degege tue!

Drom hani eu uf Instagram ond Twitte ganz viel orginölli Appezölle Wöötli gliferet. Mit gschiidem Höndegrondwesse, loschtige Gschichte ode schöne Versli.