Goht de Innerhode Dialekt veloore?

Min Dialekt het sich im Velauf vo mim Lebe imme wide veenderet. Doch wa sönd eigentlich d’Grönd, werom sich Sproch – pesönlich ond au generöll – veenderet? Ond isch ösen Innerhode Dialekt schogää vom Uusteebe bedroht?

Da het mi schono wonde gnoo ond i bi drom mit em Joe Manser zemeghocke. E eforscht ond dokumentiet de Appezölle Dialekt, onde anderem hette e s’bekannt Wöötebuech fö de Innerhode Dialekt usigee.
Troffe hani mi au mit de Celiné Signer, sie studiet mit me zeme ond mit ehre hani öbe d’Zuekunft vo ösem Dialekt gschwätzt ond wa me junge Lüüt chönd tue, dass ebe ösi schö Sproch nüd veloore goht.

Gendegrecht schwätze im Dialekt.

Fö mi isch klaa: E gendegrechti Sproch ond e gendegrechti Gsöllschaft hangid stach zeme. Will Sproch beiflosst öseri Wohrnemig, formt öses Denke ond die sozial Identität.

Doch wie söll gendegrechti Sproch töne? Wie mönd me im Alltag schwätze ohni nebid usz’schlüsse? Möglichscht nüd uffällig ond natürlich ode mömme au mol öbe die ääge Zunge stolpere zom s’Bewusstsee fö Gendegrechtigkeit z’steche?

Dene Froge gangi i der Podcast folg noo, zeme mit em Mundartexpert André Perler ond em Journalischt Dumeni Casaulta.